धनगढी । कैलालीको धनगढी उपमहानगरपालिका फूल उत्पादनमा आत्मनिर्भर बनेको छ ।
उपमहानगरपालिकाले स्थानीय किसानलाई फूलखेती तालिम दिएपछि यसपालि धनगढी फूल उत्पादनमा आत्मनिर्भर बनेको हो ।
बडादशैंको सिजनमा बढी उत्पादन भएको फूल बिक्री नभएपछि धनगढी उपमहानगरपालिकाले नै खरिद गरिदिएर किसानलाई प्रोत्साहन गरिरहेको नगर प्रमुख (मेयर) गोपाल हमालले जानकारी दिए ।
स्थानीय किसानबाट फूल किनेर धनगढी उपमहानगरपालिकाले दशैंको अवसरमा धनगढी उपमहानगरपालिका नगर कार्यपालिकाको कार्यालयको मुख्यद्वारा, गेट र नगर प्रहरीको कक्ष अगाडि सजावट गरेको छ ।
मेयर हमालको नेतृत्वमा उपमहानगरपालिकाले धनगढी क्षेत्रमा व्यावसायिक फूल खेती प्रबर्द्धन गर्ने नीति लिएको छ । उत्पादन बढ्दै गएमा सुदूरपश्चिम बाहिरका बजारमा पनि धनगढीको उत्पादनलाई पुर्याउने मेयर हमालले बताउँदै आएका छन् ।
विगतका वर्षमा धनगढीका बजारमा बाहिरबाट फूल आयात गरेर दशैंतिहार मनाउनुपर्ने अवस्था थियो । यसपालि उपमहानगरको सहयोगमा स्थानीय किसानले फूल खेती गरेर धनगढीलाई आत्मनिर्भर बनाएका छन् । धनगढी उपमहानगरपालिका–६, १२, १३ मा किसानले फूलखेती गरिरहेका छन् ।
स्थानीय उत्पादनलाई प्रबर्द्धन गर्न धनगढी उपमहानगरपालिकाले भारतबाट आयात हुने प्लाष्टिकजन्य फूल र फूलका माला बिक्री वितरणमा रोक लगाएको छ ।