डडेल्धुरा । डडेल्धुराको नवदुर्गामा ट्रयाक्टर दुर्घटना हुँदा २ जनाको मृत्यु भएको छ ।
नवदुर्गा गाउँपालिका–४ सिरुडास्थित भित्री सडक खण्डमा बेलापुरबाट सिरुडा रामजाने कन्ट्रक्सन प्रालिको क्याम्पतर्फ जाँदै गरेको बागमती प्रदेश ०१–००१ क ९६५१ नम्बरको ट्रयाक्टर अनियन्त्रित भएर सडकबाट अन्दाजी २५० मिटर तल खसेर दुर्घटना भएको हो ।
दुर्घटनामा चालक धादिङको गजुरी गाउँपालिका–७ बस्ने अन्दाजी ४० वर्षीय धिरज थापामगर र रोडाङ गाउँपालिका बस्ने अन्दाजी २७ वर्षीय विष्णु विकको उपचारका क्रममा डडेल्धुरा अस्पताल डडेल्धुरामा मृत्यु भएको छ ।
दुर्घटनामा घाइते भएका धादिङको रोडाङ गाउँपालिका बस्ने अन्दाजी ३१ वर्षीय सुदिप विक र डडेल्धुराको नवदुर्गा गाउँपालिका–४ बस्ने अन्दाजी २८ वर्षीय हिक्मत विकको डडेल्धुरा अस्पताल डडेल्धुरामा उपचार भइरहेको प्रहरीले जनाएको छ ।