धनगढी । समृद्धिका लागि संकल्प यात्राका क्रममा सुदूरपश्चिम प्रदेशको डडेल्धुरा जिल्लामा पुगेका नेकपा एमालेका अध्यक्ष केपी शर्मा ओलीले नेपाली कांग्रेसका सभापति शेरबहादुर देउवालाई फोन गरेका छन् ।
डडेल्धुरा सभापति देउवाको गृहजिल्ला हो । फोनमा ओलीले देउवाको गृहगाउँ गन्यापधुरा गाउँपालिका नजिकै डडेल्धुरा सदरमुकामभन्दा अलि तल आफू बसिरहेको बताएका छन् ।
टेलिफोन कुराकानीको भिडियो सामाजिक सञ्जालमा राख्दै अध्यक्ष ओलीले लेखेका छन्, ‘सुन्दर डडेलधुरा ! मेरा मित्र शेरबहादुर देउवाको गृहजिल्ला । यहाँ आएपछि उहाँलाई कल गरौं भन्ने लाग्यो । उहाँले आफू काठमाडौंमा भए पनि डडेल्धुरामा स्वागत छ भन्नुभयो । धन्यवाद शेरबहादुरजी ! (सचिवालयले गुडविल कलका रूपमा यसको भिडियो पनि बनाएको रैछ । त्यसैले यसलाई पोस्ट गरेको छु ।)’
अध्यक्ष ओलीको नेतृत्वमा नेकपा एमालेले बैतडीको जुलाघाटबाट संकल्प यात्रा सुरु गरेको छ । जुन यात्रा मध्य पहाडी लोकमार्ग हुँदै कोशी प्रदेशको पूर्वी नाका चिवाभञ्ज्याङमा पुगेर समापन हुनेछ ।