धनगढी । कैलालीको धनगढी उपमहानगरपालिका–४ शहिद गेट नजिक रहेको जुमेरा होटलबाट लागूऔषध चरेश र चितुवाको छालासहित ३ जना पक्राउ परेका छन् ।
लम्बाई ७ फिट ६ ईन्च, चौडाई १ फिट १० ईन्च भएको चितुवाको छाला र ६ किलो ७४० ग्राम लागूऔषध चरेशसहित ३ जनालाई पक्राउ गरिएको सुदूरपश्चिम प्रदेश प्रहरी कार्यालय धनगढीले जनाएको छ ।
पक्राउ पर्नेमा बाजुराको गौमुल गाउँपालिका–१ बस्ने २६ वर्षीय धनकृष्ण रोकाया, बुढीगंगा नगरपालिका–१० बस्ने ३० वर्षीय हेमराज जैशी र बैतडीको मेलौली नगरपालिका–३ बस्ने २४ वर्षीय करन चन्द रहेका छन् ।
विशेष सूचनाको आधारमा सुदूरपश्चिम प्रदेश प्रहरी कार्यालय धनगढी, नेपाल प्रहरी प्रदेश कार्यालय महेन्द्रनगर, जिल्ला प्रहरी कार्यालय कैलाली, वडा प्रहरी कार्यालय धनगढी र लागूऔषध नियन्त्रण ब्युरो महेन्द्रनगरबाट खटिएको संयुक्त प्रहरी टोलीले चेकजाँच गर्दा चितुवाको छाला र लागूऔषध फेला पारी पक्राउ गरिएको छ ।
पक्राउ परेकाहरूमाथि थप अनुसन्धान भइरहेको प्रहरीले जनाएको छ ।