महेन्द्रनगर । नाबालिक बालिकाका हातखुट्टा बाँधेर उखुबारीमा छाडी भाग्ने आमालाई प्रहरीले पक्राउ गरेको छ ।
कञ्चनपुरको बेलौरी नगरपालिका–७ सिंहपुरको उखुबारीभित्र हातखुट्टा बाँधेर बालिकालाई छोडेको अवस्थामा शुक्रबार फेला पारिएको थियो ।
बालिका फेला परे पनि आमा फरार थिइन् । तिनै बालिकालाई छाडेर भाग्ने आमा पुनर्वास नगरपालिका–२ अमरैयाकी २७ वर्षीया शर्मिला चौधरीलाई ईलाका प्रहरी कार्यालय बेलडाँडीले फेला पारेको छ ।
चौधरीलाई शनिबार बेलडाँडी गाउँपालिका–३ वैवाहाबाट पक्राउ गरी थप अनुसन्धानका लागि ईलाका प्रहरी कार्यालय बेलौरी पठाइएको ईलाका प्रहरी कार्यालय बेलडाँडीका ईन्चार्ज प्रहरी निरीक्षक कृष्णबहादुर कुँवरले बताए ।
शुक्रबार फेला परेकी बालिकालाई भने प्रहरीले हजुरआमाको जिम्मा लगाएको थियो । बालिकालाई छाडेर भागेको भन्दै ती निर्दयी आमाको आलोचना भइरहेको छ ।