बाँके । काठमाडौं जाँदै गरेको यात्रुबाहक बस दाङको भालुवाङस्थित राप्ती नदीमा खस्दा ५ यात्रुको मृत्यु भएको छ ।
नेपालगञ्जबाट छुटेको भे१ख ३९१२ नम्बरको माउन्टेन एयर न्यू बस शुक्रबार राति साढे १० बजेतिर राप्ती नदीमा खसेको हो ।
मृत्यु हुनेहरूमा ६० वर्षीया कुसुम बस्नेत, ३९ वर्षीय सौरभ विष्ट, ६५ वर्षीय तारानाथ पाण्डे, ३१ वर्षीय भारतीय नागरिक मुने रहेका छन् । मृतक १ पुरुषको पहिचान खुल्न नसकेको ईलाका प्रहरी कार्यालय भालुवाङका प्रहरी प्रमुख प्रहरी निरीक्षक उज्ज्वलबहादुर सिंहले बताए ।
घाइते २७ जनालाई प्रस्तावित अस्पताल भालुवाङ र लमही अस्पताल लमहीमा उपचारका लागि लगिएको छ ।
दुर्घटना भएको बस नमस्ते यातायातको रहेको प्रहरीले जनाएको छ । सल्यान निवासी २८ वर्षीय बस चालक लालबहादुर नेपालीलाई प्रहरीले नियन्त्रणमा लिएको इलाका प्रहरी कार्यालय भालुवाङले जनाएको छ ।