धनगढी । प्रधानमन्त्री पुष्पकमल दाहाल ‘प्रचण्ड’ धनगढी आएका छन् ।
शुक्रबारबाट धनगढीमा सुरु हुने सुदूरपश्चिम महोत्सव तथा व्यापार मेला उद्घाटनका लागि प्रचण्ड धनगढी आएका हुन् ।
यसैक्रममा उनी धनगढी उपमहानगरपालिका–१६ घसिटामा आयोजना हुने नेकपा माओवादी केन्द्रको प्रशिक्षण तथा जनभेटघाट कार्यक्रममा पनि सहभागी हुनेछन् ।
प्रधानमन्त्री प्रचण्डले मध्याह्न १२ बजे सुदूरपश्चिम महोत्सवको उद्घाटन गर्ने आयोजक कैलाली उद्योग वाणिज्य संघले जनाएको छ ।
यसैबीच विमानस्थलमा ओर्लिंदा प्रधानमन्त्री प्रचण्डले हमास समूहको नियन्त्रणमा रहेका भनिएका कञ्चनपुरका विपिन जोशीका बुबाआमालाई भेटेका छन् । विमानस्थलमा बोलाएर भएको भेटमा विपिनका बुवाआमाले छोराको रिहाइका लागि पहल गरिदिन प्रधानमन्त्री प्रचण्डसँग आग्रह गरेका छन् ।
विपिनका बुवा महानन्द जोशी र आमा पदमा जोशीले छोराको रिहाइका लागि पहल गर्न माग गरेका छन् ।
जवाफमा प्रधानमन्त्री प्रचण्डले विपिनको रिहाइका लागि सरकारले सकारात्मक पहल गरिरहेको बताएका छन् ।