काठमाडौं । नेपालका ६ जिल्ला कोरोना भाइरस संक्रमण शून्य जिल्ला भएका छन् ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले कोभिडको अपडेट विवरण सार्वजनिक गर्नुहुँदै भोजपुर, पाँचथर, रसुवा, मनाङ, मुस्ताङ र हुम्ला कोरोना संक्रमण शून्य भएका जानकारी दिनुभयो ।
उहाँका अनुसार रौतहट, कैलाली र बाजुरा जिल्लामा हाल पनि ५०० जनाभन्दा बढी सक्रिय संक्रमित उपचाररत रहेका छन् ।
पछिल्लो २४ घण्टामा नेपालमा ५७ जना कोरोना संक्रमित थपिएका प्रवक्ता गौतमले बताउनुभयो । हालसम्मका कूल संक्रमित १७ हजार ५०२ जनामध्ये ११ हजार ६३७ जना डिस्चार्ज भएका छन् । डिस्चार्ज हुनेको संख्या कूल संक्रमितको ६६.१२ प्रतिशत हो । पछिल्लो २४ घण्टामा १०३ जना डिस्चार्ज भएका प्रवक्ता गौतमले बताउनुभयो ।
देशभर सक्रिय कोरोना संक्रमित ५ हजार ८२५ जना आइसोलेसनमा रहेका प्रवक्ता गौतमले बताउनुभयो । देशभर क्वारेन्टीनमा रहेका व्यक्तिको संख्या २३ हजार २७५ जना रहेको बताइएको छ ।